其中一篇講及十字韌帶撕裂，沒受過此痛楚的人可能不值一看，但對於我這個將行刑的人來說，絕對有所共鳴﹗
十字韌帶撕裂，大家有睇下波都應該聽過，通常都加多句將缺席本季剩餘賽事，踢波人有朗拿度、奧雲、活基治，打nba有jordan、o'neal、amare stoudemire，小弟year two時就打波受傷成為其中一份子，從此退出球壇，一心以為唔打波就無事，點知一次行行下山落斜又整親，搞到而家好似老人家咁，行多陣都腳仔痛，見到架巴士又好似阿婆咁吉下吉下咁追，想拾返地下枝筆都要就住，企起身用力ｄ轉個身個膝頭哥又鬆想脫臼咁，今次都係要把心一橫去做手術，雖然小弟自細經常進出醫院，做手術都係打支針瞓個靚覺，做完俾姑娘硬係要對住塊面打幾巴問我叫咩名，過兩日又食得又瞓得，但人大咗真係有d怕死，知道做完個手術要抖足一年，每日要keep住做下運動train返d肌肉，個醫生又唔知手勢好唔好，塊半月板磨完又唔知人老咗風濕點算，日子越近，擔心越多，加上休息期間又唔知班學生會點，成個月留係屋企又唔個做乜，返學又考唔到試，真係麻煩多多。真係勸大家人老咗打波時要萬份小心～

各方好友，如果有緣，一年後約我在球場見吧﹗

伊度奧，與你一起努力吧﹗